Oh Samichlaus wie simmer froh
Bisch wieder einisch zu eus cho
Mir gsehnds aa dine Auge aa
Häsch au es bitzeli Heiweh gha
Um hüt mit dine guete Sache
All dini Chinde glücklich z’mache

Ich hann scho g’fürchtet , Du sigsch am Änd
Will d’Mänsche hütt Ragete händ
Zum Mond ufe, mit Apollo Drei
Und chömisch nie meh zu Eus hei
Das würded alli libe Chinde
Uf eusere Ärde trurig finde

Für eusi Wält, mer weisses ja
Bisch Du de einzig richtig Maa
Und wämer dänn emal am Änd
Uf Erde Glück und Friede händ
Dänn chasch du au mit Sack und Fitze
Vo mir us uf de Mond ufe flitze

Gott Lob und Dank bliibsch Du bii eus
Und überlahsch de andere Chläus
De Mond und sämtlichi Planete
Es hätt ja doch kein Chinde dete
Und wos kein Chind hät, gibs nur zue
Da häsch du herzlich wenig z’tue.

Mis Hüüsli stoht im Tannewald,
zmitzt im verschneite Gländ,
nur Tierli chömed dra verbi,
wenn’s öppis z’Frässe wänd.

De Schmutzli und de Samichlaus
füllet jede Tag ufs neu
s’Fuetterchrippli hinterm Huus
mit feinem, frischem Heu.

Min Esel, d’Reh und d’Hirsche
frässed gärn dervo
und was derbi uf d’Erde fallt,
das isch für d’Häsli do.

Jetz müemer aber pressiere,
es bliibt eus nümm viel Ziit,
de Wäg iä Stube vo de Chind
isch streng und ziemli wiit.

Mir händ die warme Stiefel a
und chnöpfet d’Mäntel zue.
Chumm, Schmutzli, gäll mir zwe
händ hütt no sehr viil z’tue.

Im Schwarzwald stoht es Hüsli
Im Schwarzwald stön viel Böum
Uf eimol lütet s’Glöggli
Dr Santichlaus chunnt hei

Er chunnt vo villne Chinder
Er chunnt vo mängem Huus
Sie Sack isch leer vom Schänke
Und Öpfeli sie druus.

Im Tannewald is finschter
Im Tannewald hets Schnee
Vorusse lütet s’Glöggli
S’isch wihnachtszyt juhee!

Eingesandt von Nicole Schweizer, vielen Dank

Ich bin no en chline Maa
Das g’sesch du mir nätürli aa
Ich chann nöt schweri Sache träge
Wie gern ich aber Schoggi haa
Und wie ich Nüss ufbisse cha
Das mues der sälber säge

Ich bi en chline Stumpe
und tu gern ume Gumpe
e lumpe Ornig mache
mit mine siebe Sache
de Papi seit mir Schatz
und s`Mami seit mir chlini Muus
liebe Samichlaus leer Säckli us

Iigschickt vo de Conny Auer, Danke vielmal

Ändlich, d Schuel isch us!
Jetzt schnäll hei, s Dorf durus.
Ufgabe hei mer hüt e kei,
Denn Lehrerin weiss,
Z obe erwarte alli Chind grosse Bsuech dehei.

Ändlich nachtets langsam i,
Die Zyt bis z Obe got so langsam verbi.
Us der Chuchi chunnt e feine Bänzeduft,
Me merkt, es isch e grossi Erwarrtig i der Luft.
Ändlich ghör ichs Siebni schlo,
Wie lang gots ächt jetze no?
Ich ha scho viel z lang müesse warte.
Doch halt, jetzt ghör ich öpis dusse im Garte.
Ändlich töne Glogge im Gang,
jetzt weiss ich, es got nümme lang.
Es polteret a eusi Türe,
Chumm nume ine, Samichlaus, und due kei Zyt verlüre.
Ändlich chani Dir mis Värsli säge
Und du chasch echli zu eus ad Wärmi cho,
Das chonnt dir sicher gläge.
Di Bsuech goht jo so schnäll verbi,
Doch s nöchscht Johr lad ich, di gärn wieder zu mir i.

Samichlaus, I bi so froh, 
dass Du hütt zu mir bisch cho 
Du weisch, ich tuen gern Nüssli ässe 
Hesch mis Säckli nöd vergässe? 

Eseli, Eseli hopsassa
Zieh am Chlaus de Schlitte nah
Chumm im Trapp durs Dörfli ii
Mit em liebe Chlaus debii

Es Rehli gügselet dur Tanne
Was mach dert die beide Manne?
De Schmutzli und de Samichlaus
Si streichle s’Eseli am Hals

Si nänd ee Sagi ab em Schlitte
Und stampfed druf mit länge Schritte
Durch höche Schnee, de Tannli zue
Die chömmer neh, es hätt ja gnue

Si schnufe schwär, vo all dem Chrampfe
Und s’Eseli fangt afo stampfe
Es dräht de Chopf und schreit Y-a-a
Ich wett gärn ii Stall zrugg gah

Der Samichlaus leit de Mantel aa
S’Christchindli hilft em ine
Er isch efang en alte Maa
Glich ziehts en zu de Chline
Fahrt d’Bise no so hässig dri
Hüt möcht er nöd deheime sii
Er luegt öb alles im Sack drinn isch
S’Christchindli hilft em dänke
S’lit nüme ume ufem Tisch
Hütt wett er all’s verschänke
E so voll Freud chasch niemer gseh
Wie euse Chlaus veruss im Schnee