Vom Himmel falled d’Flöckli
Wie Fäderli lis-lis
Em Samichlaus sis Hüüsli
Und Tännli sind scho wiiss
Vo jedem Chind im Dörfli
Weiss er alles, ganz genau
Und mängisch mues er süffzge
Dänn süffzged s’Eseli au

Ums Samichlaushüüsli 
liit schuehtüüf der Schnee. 
Viel hungrigi Tierli 
händ es Liechtli drin gseh. 

Sie chömet scho z’düüsle 
bi Tag und bi Nacht, 
Mir händ dene Tierli 
es Chrüpfli zwägg gmacht. 

Die Häsli, die Rehli – 
sie wüssets gar guet, 
dass mir zwei sie gärn händ 
und das tuet ne guet. 

Sie lueget eus früntli 
und zuetraulich a. 
Mir sind ja für alle 
zwei güetige Maane. 

Ich striichle min Bart 
und brummle froh dri: 
„Gottlob, mir händ z’Ässe, 
chömed ihr jede Tag verbii!“ 

Samichläusli Niggi Näggi
Het en Bart wie euse Ätti
Het en Sack voll Züg und Plunder
Öpfel, Nuss und Chestene drunder
Het es Eseli vor sim Chare
Tuet s’Land uf und Abe fahre
Bringt de Meitlene schöni Sache
Und tuet d’Buebe z’folge mache
Samichläusli Niggi Näggi
Het en Bart wie euse Ätti

Samichlous, I bitte di
Stür mer doch es Ditteli
Nid es grosses, nid es chlis
Wie dem Annebäbeli sis.

Samichlaus wo chunsch Du her?
Siebehundert Stund wyt her
Samichlaus, isch Dis Säckli schwer?
Siebehundert Pfund isch s schwer
Samichlaus machs weidli leer,
Dänn isch dis Säckli nüme schwer.

Sami Niggi, Näggi
Hinder em Ofe steck ii
Wänn d’mer öppis gisch
So chumm ich an Tisch
Gisch mer aber nüt
So chumm ich au nöd hüt.

Säg Mueti, wie lang gahts ächt no?
Bis de Samichlaus tuet cho?
Säg Mueti, cha mer d’Uhr nöd zwinge
Dass Zeiger schnäller umespringe?
Säg Mueti, cha mer Zyt nöd b’schiesse
Und am Kaländer viel Zättel abe risse?
Säg Mueti, meinsch er tüeg dra dänke
De Samichlaus, mir öppis z’schänke?

S’git vieli Chind wo meine
Es gäb kein Samichlaus
Und doch gits ebe eine
Nur weiss mer nüt so gnaus

Ich ghörne uf der Stäge
Er tuet nid ordli liis
Uf all Fäll mues mer säge
Er schmöckt nach Tannechriis

Eis tünkt mich , ohni Zwiifel
A ihm ganz bsunders nett
Dass er die gliche Stiefel
Wie euse Vater hett

Lueg, Samichlaus, ich bi no chli,
und scho mängisch es Luusmeitschi gsi.
Aber weisch, ich cha au ganz e liebi si,
drum, Samichlaus, gäu, chunnsch wieder einisch verbi.

Oh Samichlaus, oh Samichlaus
Jetzt bisch Du ändlich do
Es hett mer echli Angscht g’macht
Das muess der offe g’stah

Doch merk ich jetzt, Gott Lob und Dank
Du bisch en guete Maa
Verstahsch eus Chind und häsch eus gern
Das gseht mer dir grad aa

Kännsch allwäg mini Fähler scho
Und weisch um alles B’scheid
Hann poosget do und Poosget det
Jetzt tuets mer aber leid

Wenn jedes das miecht, wo nes sött
Wärs schöner uf de Ärde
Was mich betriefft versprich ich Dir
Es muess jetzt besser werde

Dass ich das nöd so schnäll vergiss
Und immer fescht dra tänke
Tue Du mir als Gedächtnisshilf
Es Hämpfeli Nüssli schänke